aafat ne jis ko ghera hoga
rishta koi us ka mera hoga

mehman hain us sarae ke hum
do-chaar ghadi basera hoga

jaanun hun main jaisa kuchh hai 'alam
kis ka ye hua ki mera hoga

mil lo ki na mil sakenge phir hum
ye jaan lo phir na phera hoga

andar hi jalegi sham’-e-raushan
bahar to faqat andhera hoga

rote hi kategi sham-e-hijran
uth jaenge jab sawera hoga

hum aison pe 'ashk' awwal awwal
taqdir ne dukh bikhera hoga