aafiyat zulm se aur pyar qaza se manga
hum ne insaf bhi arbab-e-jafa se manga

kar diya khuld ke har khet se be-dakhl hamein
hissa jab dana-e-gandum mein khuda se manga

jab jhatak kar uthe hum nind se bojhal sapne
tazgi subh se li sans saba se manga

nur jab chaha kiya apne hi mathe se tulua
saya manga to teri zulf-e-dota se manga

wo bhatakta raha manzil ke qarib aawara
jis ne manzil ka pata rah-numa se manga

haq-o-nahaq ki ladai ki sawaneh hai gawah
bhik mein rahm usi munim ne gada se manga

wo mera nutq hi de de to ghanimat 'shaukat'
lahn-e-daud nahin naghma-sara se manga