aah-e-shab nala-e-sahar le kar
nikle hum tosha-e-safar le kar

shaghl hai nala kuchh murad nahin
kya karun ai falak asar le kar

teri mahfil ka yar kya kahna
hum bhi nikle hain chashm-e-tar le kar

aap main ne diya dil us but ko
jhuk gai shakh khud samar le kar

tha qafas ka khayal daman-gir
ud sake hum na baal o par le kar

'wahshat' us bazm mein rahe the raat
subh nikle hain dard-e-sar le kar