aahon ka shisha dard ka patthar liye phira
main bazm mein ajib sa manzar liye phira

har ek qadam pe qatl ka khatra tha dosto
main apni aastin mein khanjar liye phira

logon ko ras aai thi aakhir hawas ki dhup
be-wajh kyon main pyar ki chadar liye phira

har pal meri hayat ka tha ek pahad sa
apni sadi ke bojh ko sar par liye phira

takhliq-e-nau ka jazba-e-kaamil tha apne sath
main ek nigar-khana-e-azar liye phira

'jami' har ek shakhs tha yun tishna-lab ki main
shahron mein aagahi ka samundar liye phira