aaina-e-hayat hai yaksar lahu lahu
lamhon ke hath mein bhi hai patthar lahu lahu

sanson ke aasman ka hai manzar lahu lahu
jaise ho kaenat ka daftar lahu lahu

aati nahin hai ab koi naqus ki sada
ehsas-e-be-nawa ka hai mandar lahu lahu

hum shahr-e-dushmanan se nikal aae hain ba-khair
tha doston ke shahr ka manzar lahu lahu

aate hi apne hosh mein dekha hai ja-ba-ja
apne tasawwuraat ka paikar lahu lahu

jab fan ke regzar mein chalne lagi thi lu
tha fikr ka amiq samundar lahu lahu

khwahish ki bastiyon mein ye manzar bhi khub hai
viran rahguzar hai to ghar ghar lahu lahu