aaj gum-gashta khayalat ne chaunkaya hai
phir koi dasht-e-junun se mujhe le aaya hai

zehn-e-awara ne ehsas ko rahen de kar
manzil-e-dar-o-rasan tak mujhe pahunchaya hai

khauf ne lut li har gam pe nabzon ki asas
dar-ba-dar ruh ki galiyon mein mera saya hai

hausle aaj bhi miras hain mere dil ke
main ne har-gam pe tufan ko paltaya hai

be-khatar kaun chala jaanib-e-manzil 'manzar'
kis ka lahja hai jo mahaul se takraya hai