aaj main hun sham hai saqi hai daur-e-jam hai
panw ki thokar pe apni gardish-e-ayyam hai

bagh mein titli hai gul hai husn-e-lala-fam hai
chandni hai raqs mein ranginiyon ki sham hai

be-hisi kahiye ise ya khugar-e-gham jaaniye
apni nakaami pe bhi khush ye dil-e-nakaam hai

hum ko in se hai tawaqqo wo sarapa hain gurez
hain wafa na-ashna hum par yahi ilzam hai

kaun rukhsat ho gaya dewi ghazal ki ro rahi
shahar mein sher-o-sukhan ke ek macha kohram hai

ek zara sa dil hai aur duniya jahan ki aafaten
sainkadon gham ke charaghon se saja ye baam hai

meri 'farhat' shairi is be-sukhan ki den hai
shairi kya zindagani bhi usi ke nam hai