aaj main ne use nazdik se ja dekha hai
wo daricha to mere qad se bahut uncha hai

apne kamre ko andheron se bhara paya hai
tere bare mein kabhi ghaur se jab socha hai

har tamanna ko riwayat ki tarah toda hai
tab kahin ja ke zamana mujhe ras aaya hai

tum ko shikwa hai mere ahd-e-mohabbat se magar
tum ne pani pe koi lafz kabhi likkha hai

aisa bichhda ki mila hi nahin phir us ka pata
hae wo shakhs jo aksar mujhe yaad aata hai

koi us shakhs ko apna nahin kahta 'azar'
apne ghar mein bhi wo ghairon ki tarah rahta hai