aaj meri palkon par qudsiyon ka mela hai
ishq teri mahfil mein dil kahan akela hai

huren teri yaadon ki jannaten sajati hain
un se aaj ye kah do zindagi jhamela hai

aaina sanwarta hai un ke dekhe jaane se
rang-o-nur kahta hai raushni ka rela hai

dard dil ko bhate hain jaane kyun lubhate hain
aankh ke sitaron ka sajta roz mela hai

zindagi ki rahon mein zindagi nahin milti
roz-o-shab ke mele mein jaane kya jhamela hai

ishq ki tamanna thi ishq ki tamanna hai
ishq hi ki rahon mein mastiyon ka mela hai

khud-shanas kya hoga dil agar use dhunde
wasl ki tamanna mein kis qadar jhamela hai