aaj tak us ki mohabbat ka nasha tari hai
phul baqi nahin khushbu ka safar jari hai

sehr lagta hai pasine mein nahaya hua jism
ye ajab nind mein dubi hui bedari hai

aaj ka phul teri kokh se zahir hoga
shakh-e-dil khushk na ho ab ke teri bai hai

dhyan bhi us ka hai milte bhi nahin hain us se
jism se bair hai sae se wafa-dari hai

dil ko tanhai ka ehsas bhi baqi na raha
wo bhi dhundla gai jo shakl bahut pyari hai

is tag-o-taz mein tute hain sitare kitne
aasman jit saka hai na zamin haari hai

koi aaya hai zara aankh to kholo 'shahzad'
abhi jage the abhi sone ki tayyari hai