aakhiri alwida'i khadshe mein
kuchh du'aen bhi rakhna baste mein

ek lamhe mein hadisa hoga
'umr lag jaegi sanbhalne mein

phir hawas nachti phiregi aur
murda bachche milenge kachre mein

un ki ta'bir mahngi padti hai
khwab bikne lage hain saste mein

zat ki qaid se nahin nikli
main akeli thi itne majme mein

mujh ko jaldi thi ghar pahunchne ki
rah gaya intizar raste mein

ek hi e'tibar kafi tha
phir nahin aai us ke dhoke mein

'shahla' us ko bahut sataungi
achchha lagta hai mujh ko ghusse mein