aalam-e-rozgar ki mari hai zindagi
phir bhi hamein aziz hai pyari hai zindagi

aasudagan-e-ishrat-e-hasti ko kya khabar
hum jaante hain jaisi hamari hai zindagi

itna bata chuke hain ki kundan bana diya
shoalon mein gham ke hum ne nikhaari hai zindagi

gul shakh par kabhi kaf-e-gul-chin mein hai kabhi
yaksan jahan mein kis ne guzari hai zindagi

har lamha zindagi ka amanat kisi ki hai
hum zindagi ke hain na hamari hai zindagi

maqdur ho to us ko badal len ajal se hum
aisi firaq-e-dost mein bhaari hai zindagi

'maikash' hamein kahan haram-o-dair ki khabar
hum ne to mai-kade mein guzari hai zindagi