aalam ranj-o-alam hai khair ho
ya khuda kaisa sitam hai khair ho

ashk tere jhute hain lekin mujhe
e'tibar-e-chashm-e-nam hai khair ho

dekh kar tujh ko kaha mahtab ne
kya ada kya pech-o-kham hai khair ho

mil gaya mujh ko pata manzil ka par
raste mein bait-us-sanam hai khair ho

us ke honton ko chhua to yun laga
chashni-e-zahr-e-gham hai khair ho

main hun khasta-haal faisal kya karun
mera dushman taza-dam hai khair ho