aalam tamam soya hai hum jag rahe hain
khushiyon ko nind aai hai gham jag rahe hain

iman o din dekhiye mahw-e-khiram hain
kahte hain aap dair-o-haram jag rahe hain

soya pada hai amn tashaddud hai hosh mein
soe hain ya ki ahl-e-qalam jag rahe hain

chehre se huzn o gham ki lakiren to mit gain
lekin jigar ke dagh sanam jag rahe hain

guzra hai koi karwan shayad abhi 'ziya'
utthi hai dhul naqsh-e-qadam jag rahe hain