be-qarari hai shab-e-hijr hai tanhai hai
aaj ki raat meri jaan pe ban aai hai

be-khabar hai wo mere haal se harjai hai
dil hai nadan usi be-dard ka shaidai hai

aaj aankhon se meri ashk hain jari paiham
aaj har chot mere dil ki ubhar aai hai

wahshat-e-dil ka taqaza hai ki milna un se
hum ne sau bar na milne ki qasam khai hai

meri aawara-mizaji ke hain charche har-su
hae kis mod pe ulfat mujhe le aai hai

kal wo kahte the 'ziya' se hain marasim gahre
ab wo kahte hain ki han un se shanasai hai