aankh ho aur koi khwab na ho
nazil aisa kahin azab na ho

kuchh to mahfuz rakhiye sine mein
zindagani khuli kitab na ho

sarf kije na is qadar khud ko
lakh chaho to phir hisab na ho

is liye katta hun ye ghadiyan
waqt ki chaal kaamyab na ho

gunj kaisi hai kohsaron mein
ye kisi chikh ka jawab na ho

kya chamakta hai tapte sahra mein
dekh chhu kar kahin ye aab na ho

ye jalan pith mein hai kyun 'faruq'
pusht par teri aaftab na ho