aankh mein tera aks tere hi ek khayal se tut gaya
jhil ka chand to machhli ki halki si chaal se tut gaya

chahne walo pyar mein thodi aazadi bhi lazim hai
dekho mera phul ziyaada dekh-bhaal se tut gaya

mushkil daur mein apnon par dawe-dari bhi kya karte
patjhad aai to har patta apni dal se tut gaya

kachche sapnon se achchha hai pakki ninden so lena
aise khwab ko kya rona jo palak ke baal se tut gaya

dil ke aage aql ki sari chaalen phiki hoti hain
dekho raja adna se piyaade ki chaal se tut gaya

tut gaya yun aankh se aansu hijr ke dhadke se 'alam'
jaise ghungru table ki pahli hi tal se tut gaya