aankhen lahuluhan kin daman bhi tar kiya
teri har ek baat ne dil par asar kiya

kuchh to tabiatan bhi the aawara-gard hum
kuchh teri justuju ne hamein dar-ba-dar kiya

yun to hamare sath kai log the magar
kanton bhari zamin pe tanha safar kiya

hum ne hi apne khun ka ghaza diya tujhe
hum ne hi tujh ko sinf-e-ghazal mo'atabar kiya

kis ne hamari rah mein kante bichha diye
kis ne hamari rah ko dushwar tar kiya

aakhir udasiyon ke siyah abr chhat gae
koi to hai hamara ki shab ko sahar kiya

sachchaiyon mein lipte hue jhut ke sabab
mushkil se e'tibar ke jangal ko sar kiya