aankhon mein us ki main ne aakhir malal dekha
kin kin bulandiyon par apna zawal dekha

saz-e-falak ne chheda mani ka rag jis dam
farsh-e-zamin pe raqsan pa-e-khayal dekha

wo kudte uchhalte rangin pairahan the
masum qahqahon mein udta gulal dekha

ye kaun hai jo mujh mein mujh se ulajh raha hai
sau bar main ne khud ko khud se nikal dekha

kya jaane kaun hain wo jin ke liye juda hain
main ne to ek surat hijr-o-visal dekha

kuchh zakhm kawishon ke kuchh hasraton ke lashe
bahar se kuchh ziyaada andar qital dekha

nakaam hasraton ki rudad mukhtasar hai
bhae wo kaam ji ko jin ko muhaal dekh

ai dil khabis ab tu kis kis pe jaan dega
main ne to har qadam par ek be-misal dekha

tarikh hai ki khud ko dohrae ja rahi hai
basi kadhi mein hum ne yun bhi ubaal dekha

dil se utar gain ab pas-e-wafa ki baaten
main ne bhi ek muddat tak ye rog pal dekha

bas tha ki us se puchhun ye khush-gumaniyan kyon
itne mein us ke munh par apna sawal dekha

kuchh saf us ka chehra matlab nahin batata
yun tha ki jaise main ne quran mein fal dekha

mujh ko gharaz nahin kuchh kaisa hai aur kya hai
jo bhi khayal aaya sheron mein dhaal dekha