aankhon se kisi khwab ko bahar nahin dekha
phir ishq ne aisa koi manzar nahin dekha

ye shahr-e-sadaqat hai qadam soch ke rakhna
shane pe kisi ke bhi yahan sar nahin dekha

hum umr basar karte rahe 'mir' ki manind
khidki ko kabhi khol ke bahar nahin dekha

wo ishq ko kis tarah samajh paega jis ne
sahra se gale milte samundar nahin dekha

hum apni ghazal ko hi sajate rahe 'rahat'
aaina kabhi hum ne sanwar kar nahin dekha