aankhon se meri aaj to barsat ho gai
achchha hua ki gham ki mudaraat ho gai

patthar utha ke laya hun hathon mein dekh lo
ab kya kahun ki kis se mulaqat ho gai

aankhon se ek qatra lahu ka na gir saka
ye zindagi to nazr-e-khurafat ho gai

afsana dil ka kah na saka un se main kabhi
har baat waqf-e-husn-e-mudaraat ho gai

kaisa ajib saneha 'ahmad' guzar gaya
suraj nikal raha tha magar raat ho gai