aao ek bar raqs karte hain
ho ke bezar raqs karte hain

teri yaadon ki tak-dhina-dhin par
hum kai bar raqs karte hain

che dinon ke thake hue naukar
roz-e-itwar raqs karte hain

zindagi ek film hai jis mein
sare kirdar raqs karte hain

dekh kar muflisi gharibon ki
apne sardar raqs karte hain

baithe baithe yahi khayal aaya
kar liya pyar raqs karte hain

baiat-e-zulm ke jawab mein hum
kar ke inkar raqs karte hain

apne rauze pe dekh le khwaja
tere zawwar raqs karte hain

kya ghazal kah di aaj 'azhar' ne
sare ashaar raqs karte hain