aarzu tum ho muddaa tum ho
kya zaban se kahun ki kya tum ho

kya zarurat hai aaine ki mujhe
meri hasti ka aaina tum ho

dil abhi tak nahin samajh paya
ajnabi ho ki aashna tum ho

sehn-e-gulshan mein ja ke raaz khula
chehra-e-gul mein runuma tum ho

chand taron shafaq mein phulon mein
rang ho nur ho saba tum ho

mujh ko tufan-e-gham ka khauf nahin
meri kashti ke nakhuda tum ho

tum se qaem hai zindagi 'naghmi'
dil ki dhadkan ki har sada tum ho