aarzuon ko ana-gir nahin kar sakte
khwab ko paon ki zanjir nahin kar sakte

kya sitam hai ki muqaddar mein likha hai sab kuchh
phir bhi hum shikwa-e-taqdir nahin kar sakte

jab bulaegi hamein maut chale jaenge
hukm aisa hai ki takhir nahin kar sakte

ye safar wo hai ki jo chhut gaya chhut gaya
phir use pane ki tadbir nahin kar sakte

jang mein kaise tikenge wo bhala hasti ki
jo kisi shakh ko shamshir nahin kar sakte

aap to khair bade aadmi kahlate hain
hum to chhoton ki bhi tahqir nahin kar sakte

sab pe pabandi usulon ki 'siya' lazim hai
sukhan-o-sher ko jagir nahin kar sakte