kaun sa ishq-e-butan mein hamein sadma na hua
dard-e-furqat na hua gham na hua kya na hua

ghair ne baat to ki baat to puchhi meri
khair se tum ko to itna bhi saliqa na hua

mahw-e-hairat hain to donon hain teri mahfil mein
hum se parda hua aaine se parda na hua

un ki ye khubi-e-akhlaq ki wada to kiya
meri ye shomi-e-taqdir ki ifa na hua

jazba-e-ishq se hum un ko bula lete 'rasa'
ye bhi kambakht tabiat ko gawara na hua