aashiqi sabr talab hai tumhein ma'lum nahin
gham-zada hun main magar tum sa to maghmum nahin

uns ho milna milana ho magar ranj na hon
jao ma'lum tumhein ishq ka mafhum nahin

deta phirta hai zamane ko to ayyam magar
lamha koi bhi mere nam se mausum nahin

chehra chahat mein nazar aae jo aksar hi tumhein
wo pari-chehra to ho sakta hai masum nahin

thag hai duniya ye le leti hai sabhi mal yahan
aur bhi mazlum hain tu pahla sa mazlum nahin

naqsh chehre ke to badle hain mohabbat ne sabhi
hairan hun dost hua kaise main madum nahin