aazad nahin zehn abhi fikr-e-badan se
nikla nahin insan abhi apne gahan se

ab dar se milta hai tera qamat-e-baala
shikwa tha tere qad ko bahut sarw-o-saman se

mausam ka nahin apne koi jism shanasa
mathe ka talluq nahin mathe ki shikan se

dushwar tha kuchh main bhi zamane ke hunar par
kuchh dur rakha waqt ne mujh ko mere fan se

kya us ko khabar hai kahan le jaegi khushbu
wo phul ki utra hai abhi shakh-e-chaman se

har rang mila hai mujhe mazi ki dhanak se
har tarz nai aai hai andaz-e-kuhan se

utra hai 'samad' shahr pe wo rang-e-takalluf
fan ko bhi talluq nahin be-sakhta-pan se