aazmaya hai mudam aap ko bas bas aji bas
donon hathon se salam aap ko bas bas aji bas

aap ki banda-nawazi hai jahan mein mashhur
jaanta hai ye ghulam aap ko bas bas aji bas

munh na khulwaiye mera yunhi rahne dije
yaad bhi hai wo kalam aap ko bas bas aji bas

hum ne kal dekh liya dekh liya dekh liya
kahin jate sar-e-sham aap ko bas bas aji bas

pijie khun-e-jigar apna janab-e-zahid
baada-o-saghar-o-jam aap ko bas bas aji bas