ab bhala kya dekhte ho aab mein
gharq sab kuchh ho gaya girdab mein

lutf meri maut ka badh jae so
zahr aur dala gaya zahrab mein

ho gai tab nur se nafrat mujhe
dagh dekhe jab dil-e-mahtab mein

main samajhta tha jinhen shirin-dahan
sar-ba-sar bhige mile tezab mein

gunje hi kaise bhala saz-e-jigar
zang hi jab lag gaya mizrab mein

dekhne ke baad sare qaede
aib phir dekhe gae erab mein

zehn mein koi khayal aata nahin
hai rawani hi nahin aasab mein

ek khuda se hi tawaqqo thi faqat
nok nikal aae magar mehrab mein

khasiyat hai in adab walon mein ek
mar dete hai adab aadab mein