ab chand nahin koi sitara nahin koi
shab itni andheri hai ki nikla nahin koi

har-chand nazar aati hai diwar-e-tamanna
chahen ki thahar jaen to saya nahin koi

chehron ko ye gham hai koi aaina nahin hai
aaina tarasta hai ki chehra nahin koi

jis se bhi milo dekh ke rah jata hai munh ko
aisa bhi nahin hai ki shanasa nahin koi

arman tumhein fasl-e-gulistan ka hai 'fakhir'
shakhon pe yahan phul to khilta nahin koi