ab is maqam par ho ana ka jawaz kya
fani wajud hai to baqa ka jawaz kya

mere sabhi charagh to pahle hi bujh chuke
ai aandhiyo tumhaari hawa ka jawaz kya

andhon ke is hujum pe kya raushni khule
jab qadr hi nahin to ziya ka jawaz kya

pahchan hi nahin hai to dastak hai raegan
kab kaun kyon ke baad sada ka jawaz kya

wahshat mein kat rahi hai meri zindagi 'raza'
marne ke baad teri shifa ka jawaz kya