ab kahan us ki zarurat hai hamein
ab akele-pan ki aadat hai hamein

dekhiye ja kar kahan rukte hain ab
teri qurbat se to hijrat hai hamein

sans leti ek khushbu hai jise
wird karne ki ijazat hai hamein

dil-jazire par hai us ki raushni
ek sitare se mohabbat hai hamein

ab zara sargoshiyon mein baat ho
mehrban lahje ki aadat hai hamein

phir usi chaukhat ki dil ko hai tadap
phir usi dar par sukunat hai hamein

hum tahayyur khol denge aankh se
ki mayassar teri qurbat hai hamein