ab ke sauda to mere sar se bahut aage tha
kya irada kisi patthar se bahut aage tha

aap ko kaise khabar ho gai jalne ki mere
aap ka ghar to mere ghar se bahut aage tha

wo to kahiye ki nigahen nahin lautin warna
ek manzar pas-e-manzar se bahut aage tha

aap ne pyas ki shiddat nahin dekhi warna
ek ek qatra samundar se bahut aage tha

jaane kis wadi-e-khamosh mein ru-posh hua
han wahi shakhs jo lashkar se bahut aage tha

ek ajab dar meri rag rag mein samaya tha 'shamim'
ek ehsas magar dar se bahut aage tha