ab kisi sar mein fasadat ki uftad na ho
aish se raat guzar jae teri yaad na ho

mujh ko sahra-e-arab qais ka tabe na kare
mere honton pe koi lailawi fariyaad na ho

un siyah zulfon ko allah salamat rakkhe
dam-e-nau shahr-e-dil-awez mein ijad na ho

rasm-e-izhaar-e-tamanna hi mita di jae
koi aansu teri dahliz pe barbaad na ho

meri hasti ko kabhi hast ki manzil na mile
un labon se bhi mere bare mein irshad na ho

aaj ki shab ho mujhe hosh se aazadi nasib
aaj ki shab to mere dard mein imdad na ho

tha bada zo'm mere dil ko tere pahlu mein
aql sau bar ye kahti bhi rahi shad na ho