ab meri nigahon mein auj hai na pasti hai
ek sail-e-mad-hoshi ek hujum-e-masti hai

ai nigah-e-na-mahram ishq ki wo basti hai
jis qadar ujadti hai us qadar hi basti hai

aashiqi-o-mahbubi aaine ke do rukh hain
husn ek baada hai ishq ek masti hai

jazba-e-ibaadat ko rakh jaza se begana
warna haq-parasti bhi ek hawas-parasti hai

dil ki paemali ka gham to kuchh nahin lekin
aisi pur-faza basti mushkilon se basti hai

dida-war koi dekhe shan-e-pir-e-mai-khana
is khudi ke chehre se be-khudi barasti hai

himmaton ke bal uttho khud-rawi ke bal niklo
laghzishon ke bal chalna nang-e-mai-parasti hai

aadmi ke chehre par bandagi nahin rahti
warna khud-parasti bhi ek khuda-parasti hai