ab to zinda hue hain hum mar ke
aaiye dekh len nazar bhar ke

saghar-e-maut de mujhe bhar ke
un ke wade hain roz-e-mahshar ke

yaad aati hain yar ki aankhen
saqiya jam de mujhe bhar ke

zinda rahte hain ya ki marte hain
muntazir hain visal-e-dilbar ke

nama-bar ka pata nahin shayad
kat dale hon par kabutar ke

ek hi war mein tamam kiya
sadqe ho jaun tere khanjar ke

subh rukh par padi hai gesu-e-shab
ab hain mehman hum bhi shab bhar ke

bahr dil ho gaya hai tufan mein
ud gae hosh dida-e-tar ke

naqsh-e-pa ban ke ai 'qamar' rahna
pir-o-murshid ke aur payambar ke