qurbaten apni jagah hain fasle apni jagah
rahaten apni jagah hain hadse apni jagah

dar-ba-dar hum hi bhatakte phir rahe hain aaj tak
rahbar apni jagah hain raste apni jagah

waqt kyon barbaad karte ho kisi ke waste
dard-e-dil apni jagah hai marhale apni jagah

kya zaruri hai kisi ka us pe paiham sochna
fitraten apni jagah hain mashware apni jagah

kyon pareshan ho rahe ho doston ye soch kar
zawiye apni jagah hain daere apni jagah

kharzaron se guzar 'qaisar' magar ye soch kar
rah-rau apni jagah hain raste apni jagah