jab se un se apna yarana hua
apna dil apnon se begana hua

dil mein jab se wo hue masnad-nashin
yak-ba-yak aabaad virana hua

yar ke dar ki gadai kya mili
ab mizaj apna ye shahana hua

jo firaq-e-yar mein aansu baha
gir ke daman mein wo durdana hua

aap ka aashiq faqat main hi nahin
ek zamana hai jo diwana hua

mere ghar jab se ki tum aane lage
ghairat-e-jannat ye kashana hua

shama-e-ru-e-ahmad-e-mukhtar par
ye dil-e-diwana parwana hua

jam-e-mai lene na paya tha abhi
dekh kar saqi ko mastana hua

ai saba aati hai tujh se bu-e-dost
yar ke gesu mein kya shana hua

dam-ba-dam aane lage dil mein mere
gham-kada un ka jilau-khana hua

badh gaya hai is qadar josh-e-junun
har jagah mera hi afsana hua

dekh li duniya ki haalat ai 'qamar'
aaj-kal apna yahi begana hua