abhi apne martaba-e-husn se miyan ba-khabar tu hua nahin
ki ghazal-sara tere bagh mein koi murgh-e-taza-nawa nahin

jo gali mein yar ki jaun hun to ajal kahe hai ye rahm kha
tu sitam-rasida na ja udhar koi zinda wan se phira nahin

wo gharib-o-be-kas-o-zar tha tujhe us ka deta hun main pata
tere kushta ka wo mazar tha ki charagh jis mein jala nahin

jo hakim pas main jaun hun to wo dosti se sunae hai
tu maash ki bhi talash kar ye maqam-e-faqr-o-fana nahin

mujhe ishq rakhta hai sar-nigun mera jal puchho na kya kahun
main habab-e-bahr ka shisha hun mere tutne ki sada nahin

tere khaksaron ne apna sar nahin pita dasht mein is qadar
ki bagula wan se ghubar ka taraf aasman ke gaya nahin

na nasim-e-bagh-o-bahaar hun na fida-e-ru-e-nigar hun
main gharib-e-shahr-o-dayar hun meri dair o kaba mein ja nahin

tere nakhl-e-husn ki konplen abhi na-shagufta hain ai pari
jo nasim aai hai us ne bhi inhen kuchh samajh ke chhua nahin

tere gesuon mein jo jati hai to mera hi haal kah aati hai
meri khasm-e-jaan bhi to is qadar ye nasim-e-nafa-kusha nahin

na main rahne wala hun bagh ka na safir-sanj hun rag ka
mujhe dhunde hai so wo kis jagah kahin aashiyan-e-huma nahin

koi zakhm-khurda hai khar ka koi khun-tapida bahaar ka
hai mera hi hausla 'mushafi' ki kisi se mujh ko gila nahin