abhi sach ka diya jalta kahan hai
hawa ka rukh abhi badla kahan hai

bahaar-e-dasht-arai ka mausam
zaminon par abhi utra kahan hai

musafir hain hum aise qafile ke
pata jis ko nahin jaana kahan hai

ghubar-e-ashnai ud raha hai
koi chehra nazar aata kahan hai

sab apne bahr-e-gham mein ghota-zan hain
nashat-e-dard ka dariya kahan hai

pahad ab aabshaaren ro rahe hain
ye baadal tut kar barsa kahan hai

ana zinda agar hai aadmi mein
to phir ye maut se darta kahan hai

meri har shab mera har din safar hai
khuda malum ab rukna kahan hai

ajab halchal mere andar machi hai
qayamat hai magar barpa kahan hai

bagule baam-o-dar se puchhte hain
hamare raqs ka sahra kahan hai

ajab be-khwabiyon mein umr guzri
jise socha use dekha kahan hai

dilon mein ek rabt-e-bahami hai
abhi ye silsila tuta kahan hai

gadayan-e-mohabbat puchhte hain
hamara wo sakhi data kahan hai

kulah-e-hirs kab rakkhi hai sar par
qaba-e-kizb ko pahna kahan hai

hadis-e-taat-o-ayat-e-haq ko
koi is daur mein sunta kahan hai

shiar-e-ijz-o-zauq-e-inkisari
ye sikka shahr mein chalta kahan hai

main duniya ke liye zinda hun 'mohsin'
mujhe khud khwahish-e-duniya kahan hai