achanak kisi ne jo chilman utha di
qayamat se pahle qayamat bula di

kahin mah-rukh se utha jwar-bhata
kahin tegh-e-abru ne aafat macha di

kahin par taghaful kahin par tabassum
kisi ki bigadi kisi ki bana di

kisi ke bayaban ko gulshan banaya
kisi ke gulistan pe bijli gira di

nigahon mein us ki basai thi duniya
badal kar nazar us ne duniya mita di

jo dekha mohabbat se zakhm-e-jigar ko
hare ghaw mein ek barchhi chubha di