achchhe insan khwab jaise hain
ek achhuti kitab jaise hain

kahne dije mujhe ke man hun main
mere bachche gulab jaise hain

meri khush-fahmiyon ke taj-mahal
mere ahd-e-shabab jaise hain

ai saba dekh dil ke kuche mein
kaun khana-kharab jaise hain

sher-o-naghma musawwiri show-biz
shauq sare sharab jaise hain

jitne nakaam hain mohabbat mein
wo bhi sab kaamyab jaise hain

ai 'wafa' chum naunihaalon ko
in ke chehre gulab jaise hain