adaen hain jo us rashk-e-pari mein
na dhunde se milengi wo kisi mein

na dekhi wo kisi ki dushmani mein
jo aafat hai tumhaari dosti mein

taghaful kis qadar himmat-shikan hai
nahin hai ab koi arman ji mein

tadapte hain hazaron kushta-e-gham
qayamat hai bapa teri gali mein

banawat mein wo kaifiyyat kahan hai
maza hai jo tumhaari sadgi mein

wo kab sunne lage hain shikwa-e-gham
khafa ho jate hain jo dil-lagi mein

juda jab se hue ho tum meri jaan
kami kuchh aa gai hai zindagi mein

wahi dil ko bacha sakta hai gham se
kabhi jo khush nahin hota khushi mein

bachana har bala se ai khuda tu
tera hi aasra hai be-kasi mein

jo dil mein bas raha hai kaun hai wo
kise malum hai ye be-khudi mein

tumhin ko chhinti hai mujh se duniya
mile the ek tum hi zindagi mein

na bhulegi ye sair-e-bagh 'hajir'
kisi ko sath le kar chandni mein