adu pur-lutf hai hum par jafa hai
meri jaan kya yahi rasm-e-wafa hai

sitam-ijad teri kya khata hai
meri taqdir hi mujh se khafa hai

hum apne haal ke qurban jaen
wo farmate hain tum ko kya hua hai

tere dar par jabin-sai se hasil
kahin taqdir ka likkha mita hai

tumhaari kakul-e-pechan se uljhun
mera baithe bithae sar-phira hai

tasawwur ki fusun-kari to dekho
wo goya samne baitha hua hai

abas karte ho taklif-e-mudawa
mariz-e-gham kahin jaan-bar hua hai

wo sun kar kahte hain fariyaad 'hajir'
kisi tute hue dil ki sada hai