adu ke pairon se kante nikalne wale
kahan hain nekiyan dariya mein dalne wale

uchhaalte hain wo ab pagdiyan buzurgon ki
hatheliyon pe saron ko uchhaalne wale

khuda tujhe bhi kahin apne dar se tal na de
ai apne dar se sawali ko talne wale

hamein bhi mil gae kuchh dost doston jaise
hum aastin mein hain ab sanp palne wale

dikhai denge wo ab sang-reze chunte hue
samundaron ki tahon ko khangalne wale

wo jin ko lutf jaden katne mein aata hai
wo kab hain girte huon ko sambhaalne wale