ba-zahir us ka qad uncha bahut hai
magar andar se wo chhota bahut hai

jahannum ki zarurat kya hai aakhir
azabon ko to ye duniya bahut hai

bade ikhlas se milta hai mujh se
mujhe us shakhs se khadsha bahut hai

zara sa chhanw thoda sa ujala
hamare waste itna bahut hai

hawas ko kam hain asbab-e-do-alam
qanaat ke liye thoda bahut hai

tere ashaar jaise bhi hain 'rahi'
magar lahja tera tikha bahut hai