afkar ke jigar mein raqsan rafu ki khwahish
ehsas ke subu mein jaise numu ki khwahish

azmat ke aaine mein apnaiyat ka paikar
taslim ki tamanna hai tum se tu ki khwahish

tanhai ki tapish se qindil qurbaton ki
rishton ki tazgi se hai guftugu ki khwahish

sahra ke sang-reze kohsar ke karishme
jin ki jalan ka tesha hai aab-e-ju ki khwahish

khubi pe khush na hona insaniyat se nafrat
ahbab ki burai khud se adu ki khwahish

aatish ana ki ubhre khirman khudi ka jhulse
'iman' kaise jage, ho aabru ki khwahish!