agar mizaj hi mein gard gard hona tha
to phir janab ko sahra-naward hona tha

use pasand bahut nile wale patthar hain
mujhe aqiq nahin laj-ward hona tha

tumhein ye shahar basane ki kya zarurat thi
tumhein to apne qabile ka fard hona tha

ye ek soch musalsal jala rahi thi mujhe
mere khayal ke mausam ko sard hona tha

'sahar' nahin tha koi aur dusra rasta
hawas ki aag se jismon ko zard hona tha