tabiat bujh gai jab se tere didar ko tarse
agar ab nind bhi aati hai uth jate hain bistar se

hamein mashuq ko apna banana tak nahin aata
banane wale aaina bana lete hain patthar se

zaban se aah nikli dil se nala aankhon se aansu
magar ek teri dhun hai jo nikalti hi nahin sar se

are nadan sachcha chahne wala nahin milta
wo laila thi ki jis ko mil gaya majnun muqaddar se

milan-sari bhi sikho jab nigah-e-naz pai hai
meri jaan aadmi akhlaq se talwar jauhar se

khuda ki shan matlab-ashna aise bhi hote hain
buton ne ban ke but sajda karaya pahle but-gar se

safi' ko muskura kar dekh lo ghusse se kya hasil
use tum zahr kyon dete ho jo marta hai shakkar se