agar wo khubsurat hai bhali hai
hamari ruh bhi to sandali hai

abhi raftar pakdegi mohabbat
abhi to wo dabe pairon chali hai

yaqinan aa gae hain bazm mein wo
nahin to is qadar kyon khalbali hai

dua phir ghaib se man ne hamein di
hamari ek musibat phir tali hai

dikhawa hai mahz shaistagi ye
tumhaari jab nazar hi manchali hai

abhi munh pher lena ai qaza tu
ba-mushkil zindagi phuli phali hai

mayassar hai sabhi kuchh zindagi mein
kami par aap ki be-had khali hai